بما كسبت رهينة …. للشاعر / محمد زيدان

بما كسبت رهينة

محمد زيدان

+ عندك ياحاج اعلام فلسطين

= لا والله يابنى

 احنا ناس

 لا ليها ف سياسه ولا ليها ف دين

+ طب وان طلبت منك علم الناس التانيين

=هفصلهولك طبعاً

قوللى بس انت المقاس .. وانتظرنى دقيقتين

+حيث كده خليه بحجم الواقع

=والواقع ده يطلع  قد ايه

قصدى يعنى مساحتة منين لمنين

+ انت هتستهبل بروح امك

ما انت عارف … وانا عارف … ولو مش عارف .. اسال امك

 وهى تقولك

هتقولك ..؟

 ان نفوذها .. سياسيا واقتصاديا وعلميا ودينيا .. عدت النهرين

وهتجبلك

الخريطة وتقولك .. شاورلى على موقفك منهم

والموقف دة وصلك لفين

= اهدا بس يابنى وحملك عليه

زمنا ده لا بتاع نضال

ولا فيه مكان لصاحب قضيه

ولو انت مش خايف … فانا خايف

بس اكيد انت عارف

زى مانا متاكد عارف

ان دول ناس جبارين

+جبااااااااااارين ؟

=اه جبارين

دول عملوا من الاقزام عظماء

وعملو من التافهين علماء

رفعوا  كل ماهو سفيه

وحرفوا فى عقائد انبياء

ومفيش مخلوق وجهلهم س

وضيف لمعلوماتك كمان

انهم زمان

كان اخرهم  حائط المبكى

اللى ايام مجدنا كان اسمة البراق

دلوقتى صلاتهم هتبقى جوا الاقصى

بذمتك دة مش جبروت وانتهاك

الموضوع زمان كان زمنى

دلوقتى بقى زمنى وجغرافى

و كل خوفى

ان غدا كل ماهو ……

+ لاء … ان غدا لناظرة

= دة حقيقى …

بس ناظرة دة .. ع الوضع اللى انت شايفة دة

هيبقى بساعات قبل يوم الدين

بس خلينا دلوقتى فى هذا الزمان

كنا بنقول اية ولا وقفنا لحد فين

اة .. كنت بقولك كل خوفى

ان غدا كل ماهو مش منهم … ومش من دينهم

ومعادى وكارة ليهم

ورافض حتى المشى فى فلكهم

ميلاقيش مكان فى هذا الزمان

خوفى يجى يوم وتلاقينا

من مسجدنا ومسرى نبينا

 مش مسموح لينا بالدخول

 ونبقى منة شبة مطرودين

+ طب وهو حد فينا

 طايل القرب منة

ولو حتى  لدقيقتين

= لاء .. بس ع الاقل لسة بيدخلة

كل ماهو مسلم

وكل ماهو حامل اسم فلسطين

وهقولك نصيحة من كلمتين

واتمنى توصل للى ع السياسة قائمين

الارض اللى هما واقفين عليها

والهدوء اللى مسيطر ومغيم عليها

ده هدوء مؤقت .. هدوء نسبى

هدوء زايف .. بمجرد ما يدخل ربك

 هيجيب على دماغهم عاليها واطيها

وزى ما احنا الاتنين عارفين

كل نفس بما كسبت .. رهينة

+ الا اصحاب اليمين

************************************

الاية القرانية الواردة فى النص من سورة المدثر الاية 38:

( كُلُّ نَفْسٍ بِمَا كَسَبَتْ رَهِينَةٌ إِلا أَصْحَابَ الْيَمِينِ )

محمد زيدان

محمد

قد يعجبك ايضآ
اترك رد

لن يتم نشر عنوان بريدك الإلكتروني.